本港家長經常批評香港教育制度唔掂，寧願送仔女留學，不過英國教育大臣高文浩（MichaelGove）啱啱旋風式訪港24小時，唔係嚟港推介英國院校，而係為英國教改取經。教車師傅求教學神，世界真係變咗嘞。
港生喺一項簡稱PISA嘅國際測試中，數學同科學成績名列前茅，遠勝英國學生，因此高文浩噚日特別去愛國學校小西灣培僑小學參觀，下晝轉到直資將軍澳保良局羅氏基金中學，考察能否將直資制度移植英國。
高文浩噚日早上同都係叫Michael嘅教育局局長孫公見面，雙方同意喺五個範疇上加強合作，包括吸引英國著名辦學團體來港辦學，為內地富二代服務。高文浩呢位客人好識做，話對新高中學制有信心。