社民連前日喺會展舉行大會，個場咁高貴，同佢哋「丐幫」個朵似乎唔係幾配合。由於租場有阻滯，八方聽聞黨高層問過數碼港價錢，不過唔啱價而且地點略為遠，一度想向康文署租借維園凉亭，但最終決定落腳會展。
前日長毛去到會場嘅時候表現感慨，佢同八方講，平日去會展唔係抗議就係請願，幾乎次次都係被保安員「送」走，今次卻唔同，社民連真金白銀租借場地，工作人員對佢客氣兼有禮，畀佢自由出入，感覺free到極。
倒閣大會落幕，背後有啲不為人知場面值得一爆，話說會上兩陣營互片，「鹵味男」錢偉洛發言後忽然離開會場，原來佢背人垂淚。八方見佢眼濕濕，佢話自己係好感性嘅人，見到黨友互批場面，一時感觸而淚下啫。