堡壘都是由內部攻破的，北京日防夜防，擔心香港成為反共基地，因此一直打壓支聯會，殊不知港府卻引狼入室，阿爺如果唔出手，難保後患無窮。
越戰時參與巴黎和談
八方咁講，係因為被譽為當今最具影響力嘅禪修大師一行禪師近日嚟咗香港，月中舉行講道大會，又喺烏溪沙舉行覺醒營，吸引唔少政商猛人慕名禪修，教育局副局長陳維安同中央政策組顧問、「心戰室」主將劉細良都入咗營。
表面上佢哋係追隨禪師體會生命真諦，實際上可能另有領悟，事關一行禪師係非一般高人。生於越南嘅一行，16歲出家，越戰時「勾結外國勢力」參與巴黎和談，越南赤化後被禁回國，流亡海外幾十年，其間接濟逃避越共而偷渡出國嘅同胞，因此一直不受越共歡迎。
幾年前越南爭取加入世貿，要營造宗教自由氣氛，05年才容許一行回國，容許其信徒活動。不過信徒修行嘅寺院去年神秘遇襲，有評論指越共係幕後黑手，因為一行已無粉飾太平嘅利用價值，加上佢公開讚揚達賴喇嘛，又進言解除宗教管制，信徒認為可能係中共向越共施壓，越共亦唔想有人「分裂國家」，因此向一行弟子開刀，小懲大戒。84歲嘅一行係所謂「左翼佛教」（EngagedBuddhism）代表人物，鼓勵信徒入世濟民，唔好只係打坐念經，難怪成為中共、越共呢啲極權國家眼中釘，佢今次來港傳授心法，由李嘉誠基金會贊助，多名高官名人追隨學道，若然23條已經立法，八方相信港府早就拉人封艇，否則大家悟出反共道理，大徹大悟拒共抗共，仲成世界？
人人心中都應有個鐘
幸好香港未有惡法，本身係天主教徒嘅陳維安先至可以安心入營、平安出營。佢同八方講，五日覺醒營最大得着係學懂聆聽同愛語，又悟出日後要多理解各界對教育政策嘅聲音。「心戰室」要員劉細良話，營內定時敲鐘，提醒眾人反省所作所為，佢亦趁機反思，獲益良多。八方問佢會唔會建議老闆曾蔭權跟禪師學嘢，佢話人人心中都應該有個鐘，要定時反省。
mailto:[email protected]