國際拍賣行佳士得（Christie's）噚日喺報紙登咗段澄清公告，話近排出現咗一啲類似佢哋寶號嘅拍賣行，有誤導公眾成份，所以要澄清。呢啲疑似佳士得嘅拍賣行叫做「香港佳士德藝術品拍賣有限公司」、「Chritrs」等。
佳士得公關話，上個月收到客人問佳士得10月澳門拍賣會嘅嘢，公司都冇過江拍賣，聽到莫名其妙，一查先知有疑似「佳士德」混淆視聽，有必要澄清，唔排除採取法律行動。八方噚日都上過「佳士德」網站，好多書畫藝術品拍品，仲可以網拍，包括大師齊白石《九蝦圖》，網拍底價27萬，暫時有一口承價，叫到27.6萬元。
「佳士德」拍賣行負責人李先生話，其公司成立三年，叫做「佳士德」藝術品拍賣公司，同佳士得完全冇關，「佢哋之前同國際互聯網協會投訴我哋網址『Chritrs』抄襲，最終判咗我哋勝訴啦」。