政府去年修例加強打擊醉駕後，酒後「打的」人數大增之餘，醉客「打的」變成「打司機」的情況也增加，揸夜更的士頓變「高危」行業。入行逾20年、屢獲嘉獎的優秀司機鄺念恩（Tommy），最近也被醉客「箍頸」，他慨嘆香港社會怨氣日重，乘客越來越暴力，「家打工仔工時長、壓力大，多咗人借酒澆愁，上咗車就搵司機出氣」。
記者：林浚川
鄺念恩揸夜更的士超過20年，待客有禮、路不拾遺，歷年獲嘉獎近10次，月初再獲運輸署頒發「優秀的士司機獎」。但好心不一定有好報，Tommy早前被醉客襲擊，「個客滿身酒氣，一上車就好勞氣好多嘢講，我見唔對路暗中報警，果然冇耐個客發酒癲，從後箍我頸，好彩警車啱啱趕到，警員即刻拉佢出車」。
帶備呎半長大電筒傍身
Tommy指自從政府嚴打醉駕後，醉客明顯大增，滋擾情況也變得嚴重，行家敢怒不敢言，「踢你椅背呢啲經常有，有啲仲會粗手粗腳，打你一兩下，司機只可以忍氣吞聲，因為報警起碼搞你三個鐘，一定蝕車租」。就算沒受皮肉之苦，司機也往往有損失，「好多人借醉唔找數，喺架車賴死唔落車，你報警叫白車都冇用，最後都係唔收佢錢，佢至肯走」。
多年來Tommy開工時一定帶備呎半長的大電筒傍身，防劫也防醉客動粗，他笑說：「好彩廿年都未用過，呢支係善良的電筒。」能夠保持這項紀錄，全因Tommy夠機警，「對啲醉客唔可以刺激佢，你鬧佢，佢肯定仲癲，如果見佢動作越來越大，最好暗中通知行家或者報警，以防萬一」。
從前夜更的士司機總被描繪成危險人物，有屠夫，有色魔，也有「的士賊」，今天司機多是受害者，Tommy除被醉客滋擾，更試過被男乘客「抽水」，「嗰次我開後面門畀個男客上車，佢閂番埋道門，要坐上前面，我已經驚驚哋」。
抽水男摸司機賞「肉金」
結果男客上車後開始毛手毛腳，「我話你再騷擾我揸車，我就報警，點知佢一邊叫我唔好嬲，一邊又摸多我兩下」。抵達目的地後，男客付20元車資笑着下車，Tommy發現20元鈔票當中夾着一張「紅衫魚」，相信是打賞給他的「肉金」。
Tommy形容近年社會怨氣重，司機慘成出氣袋，「家啲打工仔工時長、壓力大，又賺得少，暴戾咗好多」。他支持立法容許的士司機拒載醉客，或者入夜後拒絕乘客坐前座，又希望政府資助業界安裝「救命鐘」，「因為車主就算肯出錢，都係會轉嫁番畀司機，最終受苦都係司機」。
