全球流動資金湧向無遮無掩雞籠（無利率貨幣政策，又唔可以實行資本管制）嘅香港，自然吸引唔少投資、投機者嚟搵食。勢估唔到，主權基金中投同國際大鱷索羅斯（圖）咁心有靈犀，齊齊揀呢個時候嚟香港開辦事處。
《華爾街日報》噚日引述索羅斯基金管理公司發言人，證實呢家管理約270億美元資產嘅對冲基金公司，已經落戶香港開設分公司。無獨有偶，全球投資規模最大嘅主權基金之一，中投亦正式喺香港成立全資子公司中投香港。前中大校長兼中投香港董事長劉遵義就話，QE2下大量資金追逐有限資產，家吓唔係購買資產嘅合適時候。
92年9月，索老搞到英鎊撤出歐洲滙率機制嘅代表作，令佢喺外滙史上名垂千古；97年亞洲金融風暴又喺新興市場興風作浪，一度畀馬來西亞前總理馬哈蒂爾列為不受歡迎人物……相比之下，香港幾咁向「錢」看呢！