伯南克揸住直升機派錢，漫天銀紙源源不絕跌落嚟，呢啲easymoney正在消耗你嘅購買力，如警訊節目裏面當市民遇上隨時令佢哋損手嘅跌錢黨。
小股民慣性道聽塗說，對上市公司資訊一知半解，結果往往最後走甩好股留低衰股。究其原因只怪閣下跟唔足公司資料。以下求其兩則上市公司資料，假如係唔使我講你都已經知道晒嘅，就抵你攞足10個叻。
第一則：好多人以為97年挾住四路一橋來港上市的越秀交通（1052），旗下投資項目走唔出廣東省甚至廣州一帶，實質自上市後佢一直積極投資省內及省外地區分散公路項目組合，包括湖南、陝西、廣西、汕頭、天津之路橋項目及今年收購之湖北漢孝高速。
現時集團持有共8條高速公路、4條普通公路及兩條大橋（汕頭海灣大橋及虎門大橋）部份權益。現時對集團貢獻最大、佔收入達6成者主要來自06年成功增持至兼控股之北二環高速。高速公路控制中心之設計更係參考西班牙，全天候監察路面情況；每股資產淨值達5.26元。
越地土儲夠5年用
第二則：更多人以為越秀地產（123）旗下地產項目只集中在廣州，其實集團於去年底已在中山市成立地產開發公司，把業務拓展地域延伸至國父孫中山先生故鄉，發展位於南區、石岐及最新收購之博愛地塊；此外，在江門、煙台、還有在香港油塘之5.9萬平方米住宅用地，而且越地唔經唔覺已擁有達917萬平方米土地儲備，每平方米地價成本低於3千元人民幣，足夠5年發展，廣州佔比重仍達77%，最大幅位於大學城。
完成供股後，每股資產淨值亦只會由1.74元輕微攤薄至1.65元左右。人幣資產升值，加上位於廣州天河區之IFC正式試業，公司資產值及租金收入仍有大把上升水位。
胡孟青
獨立股評人