大市交投熾熱，連續4日成交破千億，資金明顯由大價股轉炒三四線，不妨瞄準半新股出擊，可留意冷門工業股華耐控股（1020），賣點有三個：攻高端產品、金手指青睞及估值吸引。現價吸納，PE上番10倍，股價可見1.85元，潛在回報三成。
華耐主要生產鋼水控流產品，簡單講即係鋼鐵零件供應商，是製鋼過程中不可或缺的零部件，如旗下產品浸入式水口，能防止鋼水在流傳過程中氧化。旗下產品主打高檔市場，用於汽車製造、高速鐵路以及軍工產業，由於上述行業對鋼材要求極度嚴謹，涉及高技術及複雜製造過程，入門門檻高，競爭對手相對較少。華耐現時市佔率約19%，排第二，加上龍頭維蘇威，在高端產品市場份額已超過70%。
毛利率超高
華耐最令人羨慕地方，是享有超高毛利率，上半年毛利率升至70.3%。競爭少可能是一個原因，關鍵是旗下產品佔鋼鐵整體生產成本不足1%，為求有穩定及優質原料供應，客戶不介意高價採購，造就超高毛利，純利率亦超過四成。形容華耐製鋼如煉金，並不誇張。
產品另一特點是壽命非常短，要頻頻更換，使用時間只有2至15小時，廠家須定時定候換parts。換言之，華耐產品銷售與鋼業興衰有密切關係，下半年鋼企生意重返正軌，華耐收入預期可同步攀升。
華耐雖只得20個客，但個個實力雄厚，包括龍頭鋼企寶鋼及武鋼。貴精不貴多，隨着內地加快淘汰落後產能，大型鋼企市佔率不斷加大，作為鋼企供應商的華耐可間接受惠。
金手指惠理基金上周首次披露持有華耐，以平均價1.25元增持至5.06%。惠理近月戰績彪炳，5隻增持股份（見表）曝光後，平均累積漲近兩成。華耐現價較惠理增持價只升15%，相信距離其食糊價尚遠。
上半年華耐多賺2.1倍至7010萬元人民幣，已等於去年全年盈利，EPS8分，保守估計全年EPS16分，現價預測PE只有7.7倍，PE升抵10倍，股價可見1.85元。建議1.45元附近買入，中線目標1.85元，跌穿1.35元止蝕。
王昇