港交所（388）一直係唔少香港股民心目中嘅愛股，事關佢作為香港嘅交所易，個份感情同埋代表性，真係非筆墨所能形容，但係自從07年尾，嗰個大意嘅司機（溫家寶），加埋阿爺無厘頭起出嚟嗰條濕滑嘅公路，令到港股直通車炒車，炒死好多260幾蚊上車嘅人之後，好多人都疑惑，呢隻股應該點樣同佢談戀愛……
連升6日 唔好心急入市
直到呢排，曙光終於再現──既有人仔產品，仲加多劑花旗國QE2（次輪量化寬鬆），港交所於是又再逼近200蚊嘞！無貨嘅散戶應唔應該買？07年高追嘅蟹民幾時可以鬆綁？一班股壇叔父輩同華華講，佢哋一致睇好……咁樣好「空洞派」喎！
其中一位老叔父張華峰（恒豐證券董事總經理）就講得最實在─港交所由上市開始，已經係佢投資組合嘅「膽」，但係千祈唔好心急入市，事關大市連升6個交易日，升咗千八點有多，咁港交所由10月到家都升咗四十幾蚊，「就算（港交所）今日再升，一定會調整，唔好急！」
有貨就賣少少good水先
張老又話，若果手上無貨，就要等個大市調整一千點至落手；有貨咩，就可以賣少少good咗水先，「我炒呢隻股咁多年，點都未試過賣晒，一定要有啲揸手！」至於呢隻股睇幾多？
張老好豪氣咁話，12個月內一定見300蚊！咁當日喺267蚊（即市新高）買入嘅，都唔使怕啦！
睇300蚊，理據何在呢又？張老話，首先，一劑QE2西水東流（西方嘅錢流向東方），香港仲要係首選，港股好，港交所自然好；第二，滬港股市唔存在競爭，因為鬼佬仍然鍾愛香港法制；第三，中國好，香港一定好，「內地經濟好，好多企業要嚟香港吸水發展……」一句到尾，香港係得天獨厚囉！
李華華
mailto:[email protected]