同一天空,兩個儍佬。萬眾期待明日曼徹斯特打吡大戰,偏偏兩軍高薪兵朗尼、巴洛迪利都冇份參與其中。話就話曼聯安排朗尼去美國養傷,但佢一到波特蘭就高調行贊助商嘅Niketown,似係被送去賣廣告多啲;咁都算嘞,佢到脫衣舞吧旺區流連,就完全唔識避嫌,盞招人口實。巴洛迪利仲儍,睇過佢前日領紅牌(要先對紅魔停賽,不過曼城會為佢因直接攞紅牌而要停3場上訴)嗰幕,怕且笑到停唔到口。
朗尼流連脫衣舞吧?
朗尼係咪去賣廣告?冇相干,反正有成個禮拜時間,畀佢去接受治療之餘,大把時間行吓街買吓嘢做show梗係冇問題,之但係佢唔淨係留喺Nike訓練中心或者做騷;而去10英哩外滿佈脫衣舞吧嘅地區流連,就算你唔行入去,傳媒唔亂寫至奇。鬼叫你個底咁花咩?
巴洛迪利冇啦啦被逐
如果話朗尼係儍,巴洛迪利更加係儍得勻循,佢前日對西布朗明明入兩球,喺英超一係唔入,一開齋就起孖。好衰唔衰呢個贏波功臣下半場連環踢對方中場球員穆林保,慌死球證睇唔到咁。佢衰得咁應,領隊文仙尼仲夠膽死話想為佢提出上訴,呢啲唔係叫溺愛係咩?
查實呢位黑人前鋒以往周不時失心瘋,年前效力國際米蘭嘅時候,對祖雲達斯時曾試過舉起中指受狠批。另外,佢完全唔掩飾自己係AC米蘭球迷嘅身份,入場捧AC米蘭之餘,仲着埋AC米蘭波衫,唔犯眾憎至奇。上季意大利盃,佢被羅馬王子托迪一腳踢落patpat,真係令人笑爆嘴。
上個月,佢返到意大利治療膝傷期間同細佬一齊遊車河,又胡亂闖入布雷西亞女子監獄,被警察扣留近半粒鐘至獲釋,更加無謂。明日曼市打吡少咗兩個儍人,場波戰局固然受影響,最重要係娛樂性肯定大減。
話你知:路蘭係朗尼老襟?
自從路蘭被指受安祖卡路爾「同化」,帶埋艷女返屋企胡混,越嚟越多關於佢嘅臭史被揭發。話說佢07年計劃緊結婚時,背住當時係未婚妻,家陣係老婆嘅希莉去鬼混,仲收過妓女嘅情慾短訊。個妓女正正係朗尼上年「一王兩后」女主角之一嘅湯普森。咦,計「輩份」,朗尼應該叫路蘭契哥喎。