阿爺隔日就話要調一調（調整也）個大陸房地產市場，唔少發展商都開始諗計改變策略，而最多用嘅一招就係轉戰商場。不過要做好一個商場查實唔簡單，發展商仲要好似阿媽教仔，教埋商戶點樣做好盤生意。
好似新鴻基地產（016）喺北京嘅apm，最近又成功引入國際品牌GAP做佢哋嘅租戶，家陣個場有一半係國際品牌。「總睇場」新地北京代辦處首席代表蔡志強話，apm會針對個場業務表現最差嗰5%租戶，教佢哋點樣做番好盤數，譬如啲外來食肆通常味道唔夠濃，apm會教佢哋做番濃啲。
蔡生又話，除咗keep住啲質素，個場亦會不停翻新，等啲客有新鮮感。繼奧運前做咗一輪翻新後，佢哋計劃下年又掟2億嚟裝修。咁又係呀，商場就好似一個老婆咁，唔保養唔搞新形象，變咗黃面婆嗰陣，搵人望吓都難嘞！