利物浦新班主約翰亨利上台後腳頭唔錯，紅軍開始漸入佳境，啱啱喺星期日就憑費蘭度托利斯（F托）兩個靚波，以2:0擊敗到訪嘅車路士，錄得4連勝；而最緊要係亨利個老婆畢索迪（LindaPizzut）養眼又識搞關係，冧死粉絲。
老闆娘識唱會歌打氣
話說佢上個禮拜睇完紅軍對拿玻里場波後，仲問緊球迷啲球會歌曲點唱；事隔幾日對車仔時，攝影師周不時影到佢同球迷一齊唱歌，似乎佢之前喺twitter話會學唱球會歌曲唔係吹水。
紅軍近期實在多靚女捧場，除咗畢索迪外，仲有禾絲妮雅琪。眾所周知，呢位網壇「1姐」係F托粉絲，愛屋及烏自然捧紅軍。就喺前日利物浦贏車路士前，佢拍咗輯拎住利物浦波衫，波衫上印有佢個名嘅相。一個唱好紅軍，一個「獻身」，紅軍想唔紅都難。
領隊鶴臣眼見球隊轉勢，前日賽後即留口訊畀老闆，要求對方科水擴軍，老闆心情大好，話唔定佢會到喎。