港府申辦亞運諮詢結果瓜多過菜，不過德成局長同副局長許曉暉仍然好賣力聽市民意見。亞運極有可能胎死腹中，不過政府鐵定明年繼續搞全港運動會，預計5月中揭幕，新增兩個項目，就係排球同五人足球賽。
搞亞運要花費數以百億元計，大興土木仲要培訓運動員，舉辦全港運消費低好多好多，預計超過3,000健兒參加，一次性使1,600萬元左右就埋單，有人形容「抵到爛」，至於係咪真係有成本效益呢？呢層八方唔敢判斷，正所謂沒有調查就沒有發言權，但主辦單位已經搵人贊助百幾萬幫補吓。
全港運參加者多數係學生，水平如何，大家有興趣儘管屆時入場看看，為咗增加賽事吸引力，搵多啲市民入場，八方知道當局又會搵國寶級運動員來港主持開幕儀式，欄王劉翔同跳水皇后郭晶晶應該係「穩膽」，至於其他「腳」，視乎邊個有時間，同埋贊助商主意啦。