教協發起嘅爭取中學小班遊行本來早兩個禮拜舉行，結果因為「鮎魚」疑似襲港延期到噚日，除咗張文光之外，好多立法會議員都有參加，好似職工盟李卓人，出席完個退休保障論壇之後就即刻趕嚟，仲着住諷刺大家樂嘅「太刻薄」Tee到場。
雖然大家樂已經知衰，收回扣飯鐘錢嘅決定，職工盟原訂星期二發動嘅罷食行動亦告取消，但阿人話，一來件Tee已經印好咗，唔着好嘥，二來「太刻薄」呢三個字都好適合送畀教育局同孫公，希望佢哋唔好再刻薄教育，好似大家樂咁回頭是岸。
同場仲有好少參與教育事務嘅石禮謙，佢話當年喺澳洲教書，十幾人一班，所以明白小班有幾重要。