社民連噚日舉行會員大會，處理倒閣議案。主席陶君行同倒閣發起人任亮憲雖然係主角，但都唔夠門口幫人登記嘅行委成員、有「社民連栢芝」之稱嘅林采薇搶鏡，唔少會員一去到見到真人都驚為天人，覺得仲靚過上鏡咁話。據講花名「波波」嘅林采薇啲屋企人唔鍾意佢曝光，所以佢行事一直低調；早前黨內有意搵佢拍住一位靚仔黨員做model影poster，吸引年輕人入黨，都被波波婉拒。
撰文力撐陶君行
噚日波波貫徹低調作風，唔想公開多講倒閣風波，只係話希望黨員尊重民主程序、尊重大會決定。但身為行委嘅波波都有滿肚苦水要吐，特別撰文力撐陶君行唔係我行我素嘅暴君，大嘆如果會員再沉溺喺是非同人格抹黑，就會睇唔到社民連嘅明天。
原來曾經喺九龍西參加五區補選嘅「大專2012」成員黃永志以及喺政府總部請願時受傷嘅「金蟬婆婆」，早前都已經入咗社民連，噚日都有現身會員大會。前者對倒閣與否保持中立，聽完兩邊表述先決定；後者帶住倒閣標語進場，取態毋須多問已知答案。