華晨汽車（1114）要學麥當勞！呢句豪語出自華晨汽車董事長祁玉民之口。佢近日接受內地傳媒訪問，指自己喺華晨第一個5年，把華晨由生存型企業變成發展型企業，進入第二個5年，他希望仿效麥當勞嘅行銷模式，喺全國多個城市建立30個專用車生產基地。
以最小投入獲最大資金
祁玉民預期，工程車同救護車等專用車係華晨未來5年重要發展嘅業務，佢希望通過引入民營資本建立混合所有制嘅專用車公司，以最小投入獲取最大資金，將呢個業務做強做大，然後於3年內把華晨汽車集團整體上市。
睇番祁總過去5年的往績，華晨嘅乘用車銷量由9000輛增至17萬輛，產能由30萬輛增至80萬輛；祁總能否把華晨提升到另一個層次真係要拭目以待。
李華華