浸大校長陳新滋噚日喺商台節目自爆，話文革時期佢由內地「游水」偷渡來港，當時嘅英文只有小學二、三年級程度，但要讀中四，惟有努力自學，當時佢計過，常用嘅英文字約有5,000個，如果一日學50個，100日就搞掂。結果，佢會考英文科攞A。
陳校長噚日又批評政府投放喺院校嘅研究資源有限，令大學嘅研究生人數偏低，一個老師平均帶一個研究生都冇，浪費咗高質素嘅教授同大學資源。若果政府投放更多資源，造就更多科研人員，加強科研成果效益，長遠亦有利經濟同社會發展。
陳校長又認為，政府應該視大學生係自己嘅子女，唔應該吝嗇資源，因為年輕人接受良好高等教育後，事業得到發展，賺錢能力提高，交嘅稅自然亦會高啲。