郭富城噚日聯同中港台三地模特兒諸葛梓岐、張雨薇同宋紀妍去咗太古城出席保暖鞋宣傳活動，現場有dancers跳舞跳到好似甩骱咁，連被封為舞台王者嘅城城都忍唔住大顯身手，不過未知城城係咪對時興舞步認識未夠深，所以跳起上嚟始終格格不入。
送靚鞋畀發哥
噚日城城全程都表現得好風騷，仲獲大會送贈男女情侶鞋各一對，佢話男裝鞋有意轉贈周潤發，因為佢知發哥好鍾意行山，至於女裝鞋就送畀同佢並肩作戰多年嘅小美。
問城城會唔會同熊黛林（Lynn）着情侶裝？城城就話：「我唔介意情侶裝，但唔會主動着，身邊好多朋友都會着，係代表默契同生活情趣。」記者再問城城有冇試過同Lynn着情侶裝？他即甜到漏話：「唔好問啦，私人嘢唔講，其實我冇試過，但又唔代表我唔浪漫。」
諸葛梓岐訂婚
現場三位模特兒都自言細個已視城城為偶像，諸葛梓岐話今個聖誕同新年會同男友去旅行，之前成日傳佢結婚，佢就話出年要拍劇同拍戲，所以未有咁快，但佢暗示會同男友訂婚先喎。