八十年代無綫小生黃日華和苗僑偉，今年在台慶劇《刑警》大鬥演技，同期當家花旦陳敏兒則早已息影，成為家庭觀眾之一「廖師奶」。她的人生舞台近年轉到教育界，以過來人身份開辦課程，讓父母學習如何做父母，她鼓勵家長要懂得放手，讓子女從失敗中成長，免疫「公主病」、「王子病」，又要家長反思：「讓小朋友活得快樂，是否就是父母的終極關懷？」
「一見到仔仔喊就心軟」
時光倒流17年，陳敏兒毅然放棄演藝事業，一心演好賢妻良母角色，「當年好緊張o架，大住肚已經四圍聽talk、睇書，學定點教仔」。誕下長子後，她望子無憂，「願望係佢過得快樂」。為了願望成真，陳敏兒不惜扮演「野蠻師奶」挑釁小學校長，「大仔小一嗰年考得差，排名好後。佢好唔開心，我直入校長室抗議，同校長講應該取消排名制度，因為咁樣做好傷害小朋友自尊心」。
由於「一見到仔仔喊就心軟」，陳敏兒不自覺地為兒子建設「無痛溫室」，卻適得其反。長子升中後成為問題學生，常見家長，「好多校規佢頂唔順，成日問點解唔可以咁做」。亡羊補牢，她急急轉演嚴母，卻被長子反問：「點解唔可以畀我過得快樂啲？」到這刻陳敏兒才醒悟「阿媽唔易做」，慨嘆：「原來我家畀佢過得快樂，係為佢將來唔快樂鋪路。」
幼子諾諾06年因血癌離世，亦令陳敏兒有所反思，「諾諾要化療要食藥，長期活在痛苦中，但睇住佢捱過一關又一關，表現出嚟堅強，就明白到人生唔係追求快樂咁簡單。」作為過來人，陳敏兒指香港家長普遍「生得少」，加上學歷高，往往不自覺地過度保護子女，成為「緊張大師」。
父母要建立溝通橋樑
「試過有大學邀請我去教家長替子女選科，我覺得好奇怪，有乜理由個仔讀到大學，仲要你去幫佢揀科目」。陳敏兒兩年前創立非牟利組織「家長匯習」，以義工身份四處開talk，教導家長應該讓子女從失敗中學會成長，「呢個世界冇人唔犯錯，家長都會，仔女都會，冇可能百分百保護仔女」。
陳敏兒建議家長首要戒除「唔衰得」思想，「好多家長小一派位鬼咁緊張，其實冷靜啲諗吓，小一派唔到，咪小二敲門插班，唔係世界末日」。家長唔衰得更往往讓年輕人一錯再錯，「點解16歲未婚產子唔會求救，而係要去埋屍？因為佢哋覺得屋企同社會都唔接受犯錯」。她認為父母最重要是建立溝通橋樑，「只要仔女有乜問題都會主動同你講，咁其他嘢都唔須要擔心」。有需要的父母，可致電27820102，或看看家長匯習的網頁 http://www.parents.org.hk/
記者 林浚川