Smartphone溝Netbook　Android筆電變大咗

Android手機就聽得多，隨住人氣急升，除咗手機之外，亦開始在Tablet上出現，最近就更進一步，上埋電腦身。東芝SmartbookAC100就係首部Android小筆電，有鍵盤可雙手打字外，屏幕仲由手機芒仔升級到10.1"，睇得舒服啲，加上唔夠1kg嘅重量，亦可以拎得輕鬆啲。

記者：許福合
攝影：伍慶泉
Model：JeanaHo@GME

五星級機型

東芝將呢部AC100叫做Smartbook，顧名思義，就是打正旗號想將Smartphone同Netbook結合。AC100外形認真唔錯，以黑色為主色，再加上勁搶眼嘅橙色線條做配襯，極有東瀛機風格，係近期新機比較少見。而且個芒由手機級芒仔升呢成電腦級10.1"，但機身重量仍然Keep到超輕身，只有870g，試用時ModelJeana三隻手指托住近10分鐘，仍然輕鬆，NoProblem！厚度都只係14-21mm，配上碳纖維紋理，機面唔怕留手指模，外形可以畀5星佢！

1.三隻手指托住，一樣輕鬆。

2.機身有碳纖維紋理，唔怕留手指模。

3.連TouchPad同手枕位都有碳纖維紋理。

4.有埋HDMI，方便駁電視或投影機做Presentation。

5.又輕又薄，放得落手袋，行完街再開工。

雙核心速度爽快

留意，不要誤會Smartbook係一部電話，佢係無電話功能，亦無3G上網，偏向作為一部用Android系統嘅電腦，UI介面同手機好相似，不過無Touch芒下，操作就變成同傳統電腦一樣，主要靠鍵盤同TouchPad。桌面亦如手機一樣，有五個頁面，可以自己安排設計，亦可以放置常用嘅Widgets。系統並非視窗品牌，鍵盤上自然無咗「旗仔」掣，代替嘅係數個可以快速啟動軟件嘅快速鍵，亦留有搜索鍵，一按就可到Google搵資料。
不過用家最關心，可能都係效能表現，使用NVIDIATegra2501GHz處理器，有雙核心架構，用起來比現時Netbook更爽快，啟動軟件速度都算合格，試過播放高清影片，順暢度亦算滿意，但屏幕解像度只有1,024×600，使用《Opera》睇中文字時，亦唔多靚，好彩電池可以玩到8粒鐘，加上輕巧嘅機身，需要流動電腦工作嘅用家可以考慮。