【江門直擊】劉德華前晚到江門擔任綜藝晚會的表演嘉賓，身為鄉里兼壓軸嘉賓的他最受歡迎，惹來女歌迷突破防線，衝上台欲親近，雖然華仔被打斷唱歌，但他仍甚有風度護送女歌迷離開。心情大好的華仔更開腔回應胞弟被起底擁半億身家的報道，但一問到有關代母問題，就即大耍太極說：「相信你哋問我時都心虛，不如就咁跳過去。」
劉德華、容祖兒、梁詠琪等前晚到江門五邑文化廣場出席「群星閃耀江門情」綜藝晚會，夏雨和商天娥合演歌舞劇，胡定欣、莊思明、陳爽等無綫女藝員就大跳韓國人氣組合WonderGirls的中文版《Nobody》。
身為鄉里的華仔以壓軸嘉賓身份出現，即時掀起高潮，華仔在台上一口氣唱了三首歌，當他演繹《愛你一萬年》時，魅力驚人的華仔又再惹來女歌迷衝上台，該名女歌迷成功突破公安防線，一衝上台就想攬着華仔，不過即時被公安制止，被打斷唱歌的華仔就甚有風度護送對方下台，即時冧爆粉絲。
唔知胞弟身家厚
事後華仔接受訪問時心情大好，對於最近有周刊對其胞弟劉德盛起底，一向不多談家事的華仔竟然樂於回答，有指其弟有半億身家，更被拍得鬍鬚滿臉平民look，華仔聽到胞弟有半億身家時即大反應說：「唔係啩？我諗問番本周刊囉，我冇睇到，係細佬打畀我，問我驚唔驚佢咁嘅造型影響到我，我聽到都好感動，佢都唔係好差，有佢味道，我覺得係我影響佢就真，總之唔想影響佢屋企。」
提到近日熱爆全城的李家傑借肚搵代母誕下三胞胎男嬰時，為了傳宗接代而結婚的華仔就即如中死穴，問到他有否考慮找代母時，他就大耍太極說：「冇諗，你哋唔好問我呢啲嘢，相信你哋問我時都心虛，不如就咁跳過去。」
梁詠琪舞動毛毛
至於穿上毛毛新裝的梁詠琪在拍照時不斷搖動身上的毛毛，即時令她胸前增添不少立體感，她笑說：「件衫好有神奇效果，我家籌備年底北京個唱，希望以最佳狀態見觀眾，仲會試下跳韓國嘅hiphop舞，會以型為主。」
此外，同場的吳浩康前晚與舊愛胡定欣碰頭，兩人大方合照，就連吳浩康的未來姨仔莊思明也不避忌，與兩人影合照，不過吳浩康卻反問說：「呢幅相係唔係有關係o架？」
採訪、攝影：曾小嘉