九洲發展（908）喺1年低位上落，窗口或紅籌公司當中，九洲超落後，冷灶值得煲煲。九洲係珠海市窗口，最新市值得8億元，喺所有窗口公司當中，晒士最細一家。集團股價低殘，係主因。但要咁睇，九洲對上珠光系債務重組落實，加埋集團又係珠海市上市旗艦，對九洲展開業務壯大，應該有番憧憬。而九洲市值咁奀，無可能承受大晒士注資，博集團業務及市值壯大，九洲已經值得煲。再講，九洲最新NAV每股1.16元，現價0.72元折讓近38%，至於同九洲業務好近磅嘅中旅（308），家陣股價都升到冇晒折讓，PB兼挨近兩倍。
講PB，九洲抵搞。一於長、短棍，一注擺長線少少，博九洲有業務壯大機會，一注博炒落後，望番1字頭，九洲現價升幅39%，仲係講緊有折讓。
第一上海博短打
第一上海（227）最新NAV每股1.86元，現價1.39元折讓25%，睇落唔算多，但呢期港股一支箭，唔少證券股已經升到過咗NAV水位，第一上海顯然吸引。又港股大旺，第一上海下半年嘅證券經紀或投資業務，應該肥仔水，2010年度埋單計數，張成績表應該可以。呢轉短打，同樣博第一上海上番NAV每股1.86元，集團現價潛在回報率33%，已經有魚有肉。
錢雋