那個演員不想一劇成名，名利雙收，熱播中的無綫劇集《巾幗梟雄之義海豪情》，觀眾鬧爆當中衰到貼地的漢奸梁非凡，這個角色讓在螢幕前默默苦幹了23年的麥長青（麥包）矚目彈出，掌聲下的他沒有太大的雀躍，依舊保持平常心，麥包深明角色有主次，他還是樂做觀眾眼底下不平凡的綠葉王過戲癮。 撰文：比華利
忠角故然討好，但奸角若演得入肉，同樣會受觀眾追捧，無綫熱播新劇《巾幗梟雄之義海豪情》中的廣州警察局的科長梁非凡，為人愛邀功弄權，瞞上欺下，比過街老鼠更乞人憎，麥長青把這個角色演得不慍不火，該劇開播三周，非凡哥一角比主角更出位！
劇情交代壞事做盡的非凡哥雖淪為漢奸，不過在結局時良心發現，倒戈為民請命殺日軍，事敗反遭槍殺。到底麥包如何揣摩演活非凡哥？他日前接受專訪時說：「我平時留意身邊人所作所為，將佢大雜燴，非凡哥呢種人比比皆是，不論大集團小機構都存在呢種人。」麥包把過往細微觀察放大於角色內，於是非凡哥的討厭嘴臉就顯得更立體。
享受團隊精神
角色受矚目，麥包謙稱《義》劇受觀眾熱捧，他認為台前幕後都功不可沒，麥包說：「我覺得《義》劇做得好，冇話邊個嘅功勞，拍劇係teamwork，呢套劇咁成功，係因為有添哥咁好嘅領導班底。」麥包也沒期望憑這套劇在台慶頒獎禮上拎走任何獎項，他說：「如果要拎，我唔希望係個人獎項，寧願攞套劇嘅團體獎。」
麥包續說：「我係演員，拍乜都咁享受，做演員要做好自己本份，《義》劇嘅演員間彼此好有交流，甚至任何一位臨時演員，佢哋都交足功課，表現專業。特別係警局群戲，主角背後有唔少老臨警員，佢哋全部都好落力，就算鏡頭未必影到，佢哋都企得直一直，正正因為每一位演員都咁用心，於是互相影響大家都要畀心機做到最好，競爭不自覺就出咗嚟，呢啲咪團隊精神，成件事先會做得好。」
受挫激勵壯志
麥包於87年參加無綫舉辦的《超級新星大賽》入行，效力至今23年，一直默默耕耘，謹守崗位，但始終未有一個角色令麥包彈出，非凡哥一角食正天時地利人和，終於吐氣揚眉，他平常心說：「我唔覺呢20幾年屈住屈住，反而係享受足咁多年先啱。」
麥包回想99年參演《茶是故鄉濃》，因為很喜歡當中鍾漢牛的角色，以為是演藝生涯轉捩點，卻事與願違；不過這個打擊卻沒打沉他的壯志，反令他開竅，他說：「我問自己係咪冇畀心機，求其咁做，但做戲嘅嘢冇中間位，所以我每套劇都冇留力去演。」
問麥包最想非凡哥一角為他帶來是名還是利？他坦言沒有任何名利指標，並說：「我唔貪心，只希望全家人生活一天比一天好，我細細個喺順德家鄉長大，乜嘢窮未捱過，不過家有頭家，有妻有仔女，我一定顧咗佢哋先，以前讀藝訓班，一支水一個麪包就搞掂，我個手機入面咁多朋友電話，每日打去呃餐飯有幾難，睇怕食幾年都未餓得我死。」
那誰又是麥包圈中知心友？他一口氣細數有黎耀祥、陳浩民和張衞健等水蛇春之名；麥包指《義海豪情》中的死對頭劉醒黎耀祥跳出鏡頭，現實二人關係亦師亦友，麥包說：「我同祥仔合作拍過好多劇，大家駕輕就熟，呢個師兄好錫我，記得拍《西遊記》，祥仔會同我研究劇本同角色，佢睇好多書，分析能力強。」兩兄弟互相研究角色，麥包消化完便融會在角色中，令演技更揮灑自如。
麥包的下個目標是希望參演喜劇，最恨挑戰元老笑彈盧海鵬，他說：「最鍾意睇佢做《EYT》，佢好識搞笑，畀觀眾歡樂係一件好舒服嘅事，好想公司安排我拍吓喜劇，等我每晚都可以將開心帶畀人。」