《諜海風雲》以二戰前的舊上海做背景，講間諜部份唔多，反而係重現舊上海的感覺好正，無論建築、交通還是衣服，全都做得好細緻。日本仔打中國，轟炸機由遠而近，近炸遠爆啱晒試環迴立體聲效。
記者：符樂
槍聲 遠近強弱
日本的勢力，早已覆蓋二戰前的舊上海，全劇好有編排地由光到暗，由輕至重，睇得好舒服。飾演美國特務保羅的尊古錫，剛抵上海，日光日白都見日本仔周圍殺人。中段，保羅越查越深，場景由日轉夜，抗日分子的暗殺行動漸多。尾段，日本偷襲珍珠港，轟炸機旋即搶攻上海。Blu-ray中的TrueHD聲效即時發揮，子彈衝住嚟，遠近強弱，無所遁形。
必睇！雨中槍戰
全劇的高潮位，在謎底解開後，還以為事情將要告一段落，殊不知發哥飾演的藍霆出現，要保護妻子離開。
滂沱大雨，藍霆、保羅及田中上校，三人互相猜度，唔係你死就係我亡，劇力十足。時局、天氣、人物關係，營造出「亂」的氣氛。一輪爭奪後，形勢急轉，暴雨加槍戰，畫面極豐富。不得不提，發哥的許文強造型重現，兩手插袋，「型」真的可以跨越時空。
睇鞏俐性感Look
鞏俐飾演的安娜，係上海黑幫大哥的妻子，出入自然有派頭，但佢同時又係抗日分子，雙重身份，造型超過10個。
忘記鞏俐在《滿城盡帶黃金甲》入面金碧輝煌，首飾多多的皇后Look；換來珠片旗袍、DeepV晚裝及輕紗長裙等，估唔到佢都可以咁清秀。齋睇佢着過嘅靚衫及造型，對眼有排忙。
Profile
《諜海風雲》
$99（BD）/$79（DVD）
畫面：1.78:1
音效：DolbyTrue-hd7.1
