金錢原來真係未必萬能。雖然曼城前鋒泰維斯（圖）嘅周薪約為15萬鎊，但思鄉情切，身處異地嘅佢又唔捨得同兩個喺阿根廷住嘅女分開，成日同人呻已經好多年聖誕冇同家人過。咁仲唔止，佢家陣個女友又因為事業唔肯同佢一齊住喺曼市，冇親情、冇愛情，有乜辦法唔搞到精神崩潰？據英國《太陽報》講，泰維斯早排曾先後3次返阿根廷，秘密睇心理醫生，呢種病比受傷更嚴重，手尾長。