罷食大家樂如箭在弦，自由黨田二少揚言會參加，當日唔幫襯大家樂，近日炮轟大家樂絕不手軟嘅行會召集人梁振英（圖），原來都係大家樂長期顧客，因為佢office樓下有間大家樂，平日中午冇飯局，據講CY會自己去大家樂買飯盒。
既然係常客，相信CY對大家樂出品應該幾滿意，唔滿意嘅只係刻薄員工手段啫，對於工會、學生會發起罷食大家樂行動，唔知CY會唔會好似田二少咁響應呢？八方問過CY辦公室中人，佢哋話暫時唔知道當日CY有冇打算罷食。咁唔客氣批評大家樂，質疑大家樂扣飯鐘錢唔合情、唔合理兼唔公義，八方相信CY短期內唔會俾人見到佢幫襯大家樂。