【天津直擊】有無綫親生仔之稱的林峯，早前被六嬸方逸華親信、邵氏電影創作總監黃家禧指其電影票房仆直，高層樂易玲昨午特別陪林峯見記者，還拿出六嬸親筆「無懼閒言」的鼓勵信，樂易玲更揚言撐硬林峯，林峯含淚回報，自言已流着TVB的血！
林峯昨日在天津為國際華裔小姐任表演嘉賓，昨午無綫特別安排林峯綵排探班，他在無綫高層樂易玲陪同下接受訪問，回應早前邵氏電影創作總監黃家禧指其在電影界未站穩陣腳，及他孭飛的《翡翠明珠》票房仆直一事。
對頒獎禮增信心
林峯甫見記者即說：「我未睇過報道，其實我今年先喺電影起步，我會接受所有意見，自己會努力。《抱抱俏佳人》暫時收過千五萬，成績都OK，我入行到家都喺聲音中成長，都慣咗。」此時樂易玲即拿出方逸華寫給林峯的鼓勵信，上面寫道：「無懼閒言，好評如潮，再創佳績。」及後林峯拿着信件與樂易玲合照時，含淚微笑，表現感動。
林峯說：「老細寫份咁嘅鼓勵說話，我真係好意外，上年演唱會我見方小姐出現，已經好開心好感動，好多前輩喺TVB出身都話流緊TVB嘅血，我終於明白，有咁好嘅老細睇住我，我會好有鬥心，你問我頒獎禮有冇信心，我會答有！」
問林峯有否為黃家禧言論生氣，他說：「我冇聽過冇睇過，前輩對我有評價，我會諗一諗，睇有乜改進。」被問到今年視帝乃陳豪及黎耀祥之爭，在《談情說案》任男主角的林峯說：「每年去到頒獎禮，我都平常心，公司好多前輩，後輩最緊要做好自己本份。」
樂易玲：好大鑊
樂易玲談到黃家禧酒後吐真言，她謂那全都不是真。問到方逸華有否為此不高興？樂易玲說：「佢哋有傾過，方小姐知道發生乜事，我當日睇完報道要冷靜吓，之後睇多次，當時唔係好激動，只知道大鑊。」事件有否打擊林峯？樂易玲說：「我唔擔心林峯，擔心黃家禧，佢會仲唔開心過林峯。」是否撐硬林峯，樂易玲即說：「係，撐，藝人一定撐！」
樂易玲又謂黃家禧事後致電曾志偉，就他指志偉與方逸華為賀歲片《我愛香港》的題材有爭拗及曾劈炮一事道歉，樂易玲謂志偉只見過方逸華一次，她又說：「之前想開關於旅行社嘅戲，又怕涉及菲律賓旅遊巴事件，所以擱置咗。黃家禧一直唔在場，只係寫過啲鼓勵說話，叫我攞畀志偉。」
採訪、攝影：曾小嘉
