來生轉為杭州人吧！男女都好，反正在這裏，快不了，趕不了，我這一生人受夠「趕頭趕命症」的折磨！來杭州就像為生活吊鹽水。無論坐船遊西湖，嘆龍井，行古街，無論做甚麼，hea字行頭最緊要！OK，知你到杭州想盡情地hea，onedaytour已排定畀你，let'scheck！
記者、攝影︰占占美
鳴謝︰港龍航空
杭州版
茶園打龍
八九十年代，香港興起一股沙龍熱，少男少女畀百幾二百蚊就可青春留倩影，估唔到，呢股熱潮再次在杭州翻叮！茅家埠茶園正是他們的取景熱點，一路在附近的茶園嘆茶，一路睇人擺甫士，快樂原來好簡單，嘻嘻！
行程1
嘆洗手盆咁大乾隆魚頭
由上海出發坐完45分鐘高鐵，肚子空空，想立刻食餐飽。來到與杭州特產相呼應的「龍井路」，周圍都滿佈茶園，最正係……稍後再講。我們選擇可到室外嚐茶的「春夏秋冬」，一路剝瓜子嘆住龍井，鋤大D曬太陽，人生一大快事，還有試試幾味小菜，最欣賞蜜汁南瓜，對於香港人來說應該是飯後甜品，但這裏放在前頭卻無影響胃口，清甜嫩綿，細細啖細細啖，好快搞掂半碟。甜完過後再刺激一下味蕾，整鍋洗手盆咁大的乾隆魚頭皇，找來杭州鄰居千島湖魚頭，配合比冬蔭功更辣的魚湯，越飲越見辣，魚肉又多又滑，最緊要食完唔使因為味精而狂灌水。
a.春夏秋冬花園餐廳
地址︰龍井路98號
行程2
河坊街掃小食
飽餐一頓，到河坊街本想單純走走消化肚皮，但原來都逃唔過再食嘅命運，鬼叫內地大把小吃咩！
試吃1︰定勝糕
相傳是南宋時期傳至杭州，每次岳家軍出征，百姓都沿途送上攞個意頭，查實用料只是簡單的糯米粉及白沙糖，再用木模壓實就可以賣，甜甜哋入口軟糯，用嚟配酒或單食都得。
定勝糕小店
地址︰河坊街236號
試吃2︰糖畫
買嚟都唔會食，純粹藝術欣賞。利用加熱的紅白糖做顏料，用匙做筆，在糖漿還熱時即席揮毫畫出唔同生肖動物圖案，所以畀錢時，會先轉個輪盤，睇睇將為你畫咩動物。
地址︰河坊街路邊攤
試吃3︰香香栗
秋冬季節，返內地就輕易見栗子的蹤影，今次試的「香香栗」，相信是來自河北（阿姐只答係野生），細細粒薄皮又甜又粉，食完唔黐手，相信無加糖漿。
地址︰河坊街165號
b.位置：河坊街
行程3
划入仙境買杯咖啡
甫落地已想到西湖旁走走，本想選擇單車遊，但沿湖路人多車又多，危險度直逼越野單車，惟有選擇價高但更值的遊船河，講價至兩百蚊人仔兩個鐘，頭半個鐘還未覺西湖如傳說中咁正，因沿湖仍見太多現代化建築，但遊至新西湖時（只有人手划小艇才可以進入），只有藍與綠的仙境終出現！沿途口渴，可以叫船伕撐你去買杯咖啡再上船，感覺好得意。
行程4
十年打造大金球
由01年開始，錢江新城將是杭州市最矚目地標，差不多十年工程，已接近完工階段，由三座地標為中心（由加拿大建築設計師卡洛斯奧特CarlosOtt設計，他曾設計巴黎巴士底歌劇院），金色球形的國際會議中心、市民中心、大劇院及所包圍住的波浪文化城，還有可飽覽錢塘江的城市陽台，到真正開放時，你會心諗一句「呢處係杭州？」（順帶一提，呢度亦變成龍友勝地……）
Hangzhou'swalker
溫馨提示：南宋御街鄰近河坊街，是一條新開發的步行街，內裏環境清幽典雅，但引入的商戶卻毫不起眼。
TravelMemo
持有效回鄉證或卡均可。中國旅行社：28533533
港龍假期三日兩夜杭州套票包來回機票連兩晚酒店，每位$2,839起，推介酒店HyattRegencyHanghzou。港龍假期︰ http://www.dragonair.com.hk
1元人民幣約兌1.16港元（文中價錢已折算港元）
220V，兩扁腳插座
中國
杭州
下周間中天晴，8-20℃
