前高官梁展文離開官場後加入新世界，幫大地產商打工令人譁然，立法會對呢單嘢做調查，審完梁展文、純官等人後，本應公開報告，但由於一直傾唔掂數如何下結論，因此一拖再拖，八方聽聞專責委員會覺得拖無可拖，決定快馬加鞭，希望一、兩個月內可以完工。
為咗達標，有人建議星期日都開會，由於立法會無此慣例，建議實在太激進，八方聽聞議員討論後認為暫時唔使咁激，所以唔會破天荒喺星期日開會，不過星期六就要全天候趕工，今日上、下午都要開會，全速撰寫報告內容。呢個報告牽連甚廣，涉及人士都十分緊張，因此如何寫結論爭議甚大，有人同八方講，為免失望，都係唔好太大期望。