facebook又再被「河蟹」。繼三名網民反對恒基在南生圍建豪宅，遭到facebook連環封殺後，噚日又有網民中招，今次仲要係元朗區議員鄺俊宇（Roy）。呢名80後區議員上星期喺facebook發起「萬人聯署，決不讓南生圍淪陷！反對濕地建豪宅…」嘅群組，短短幾日已有幾千人聯署，終於突破10,000大關，點知即刻出事，facebook即時禁止佢嘅發佈權。
「睇你封殺得幾多個」
阿Roy同八方講，打算本周在街頭舉行簽名運動，反對地產商入侵南生圍，所以喺facebook發起號召，點知被封殺，唔可以喺群組發表任何訊息，佢話原因心照不宣，地產商惡晒，路人皆知啦，況且佢都唔係第一人。但佢就奇怪點解聯署過萬就即刻被封殺，特首個「上亞厘畢道」都有成萬二人啦。佢託八方同施壓者講，唔好搞咁多小動作，「禁得一個人，仲有千千萬萬人，睇你封殺得幾多個」。