日韓台BoyGroup瘋魔萬千港女，地頭蟲一直奮力起錨，惜總難逃快餐宿命，致命原因離唔開唔唱得唔跳得樣唔得甚至全部唔得。過去十年本地男子組風雲，幾十張面孔觥籌交錯，敢死隊魚貫登場，近年又有狂派趁墟。今回BoyGroup晒冷，如果你能噏得出歷年來邊隊打邊隊，你就真係好好嘢。
撰文：蘇芬妮
Boy'z
出道年份：03年
代表作：陳偉霆嗒鄭蔡卓妍
食住Twins條水，硬砌MK花o靚關智斌（Kenny）、張致恆（Steven）成二人組，銀彈效應出道時係威係勢，攞過叱咤新人組合金獎。05年小斌斌唔埋欄玩個人主義，Steven另組Dennis組成SunBoy'z，後來更搭多件陳偉霆變三人組，特點是舞步猶如三重奏般永遠唔齊。09年陳偉霆離隊單飛、Dennis讀書、Steven繼續媾女，Boy'z終解體。
Shine
出道年份：02年
代表作：歌曲《燕尾蝶》hit盡一時
算是近10年成就最大的男子組合，成員徐天佑和黃又南貌似郭富城及金城武，《燕尾蝶》一曲更曾創造一刻傳奇。兩人曾奪02年度叱咤樂壇組合金獎，又南更憑《香港有個荷李活》提名03年金像獎及金馬獎最佳新演員，惜兩人受負面新聞拖累，於07年解散。天佑日前說：「我同又南近年各有各忙，都有諗過2012年開十周年演唱會。」
EO2
出道年份：00年
代表作：在無綫劇《大冬瓜》扮玉帝及天神
02年與E-kids合唱《魅力移動》奪《勁歌》最受歡迎合唱歌曲金獎及最受歡迎新人組合銀獎。出名跳得，但轉戰公仔箱後更入屋，演過TVB劇《大冬瓜》，去年又任亞姐表演嘉賓，最近則做《獎門人》。EO2至今成立十周年，算是襟撈組合。
Bliss
出道年份：04年
代表作：Oscar媾女戰績
Sillything首隊男子組合，一高一矮，一個似姚明一個似王嘉明，行全能唱作風。04年推出首張大碟包辦作曲編曲及監製顯才華。三年後解體，Oscar單飛出EP後了無聲氣，但情史更精采，與吳日言、Race和衞蘭先後傳緋聞。
4anda(son)
出道年份：09年
代表作：4神仁龍拳
體育健將4神合體，面目模糊，時以F屍流星look草原唱情歌，時於爛車場示範狀似恆宇仁龍拳的kickboxing高唱《熊貓眼》，打正旗號宣揚運動，但舞姿烏厘單刀。早前推出性感文藝寫真散文集，瞇眼配頭部45度角傾斜上揚大頭相，cool到打冷震。
E-kids
出道年份：00年
代表作：Tommy被澳門高利貸押返港收數
三位成員於Stareast餐廳工作，獲譚詠麟提攜入行，以金髮暴風look殺入o靚界，03年出席MK活動以300粉絲撼贏同場勁敵Shine及Boy'Z，惜後勁不繼。06年Tommy在澳門豪賭輸24萬被高利貸押返港，要公司打救，洗底四年後，Tommy宣佈E-Kids今年重組。
VRF
出道年份：01年
代表作：丁子高娶楊天后
VRF的《寒冰掌》辣㷫MK，對手推甩兩件，但未能卸去凶險，由於唱片銷量差，丁子高和Ronald率先離隊，另兩名成員轉二人組合延續，終散band收場。VRF壽命兩年，隊員失蹤多時，丁子高轉職公關，去年與楊千嬅結婚。
Charcoal
出道年份：10年
代表作：Bevis貌似周秀娜、C.Wa似吳京
06年受訓，多次於MK商場演出，今年初出道，仿韓包裝具泡菜之形無泡菜之味。MCJin曾問Charcoal稱號何來，答案：「意思一開始就冇嘅，想搵個名易記，之後再不斷放啲意思落去。」最新解畫是似炭越做越紅，但紅完之後……
