"加里夫巴利未夠紅"
禾仔一復出即發揮電兔速度，大獲老頂雲格好評讚佢可做亨利，哈哈，我上周已講嘞，呢位o靚仔越嚟越似佢師兄；不過英球壇另一位快翼，人氣仲勁，佢就係成條左路打晒嘅熱刺加里夫巴利。可惜佢出身威爾斯，如果唔係，同禾仔喺英格蘭雙翼齊飛，餵波畀長人中鋒高治，可回憶番80年代英格蘭高空轟炸踢法，就最有快感。
不過，國米由賓帥吹雞，教慣英超都嘜唔住巴利，但大家睇番曼聯上周食死熱刺嗰場，費Sir用拉菲爾達施華嘜到對方一戙都冇，就知領軍功力高低。禾仔經過多年磨練，老細俾佢慢慢踢番當年喺修頓成名嘅正前鋒位，21歲巴利想再升呢，除咗可投豪門球會，益球會大賺一筆外，還可試吓越打越前。
靠天生速度喺現代足球唔襟玩，你睇吓周中曼城歐霸盃半場被換走嘅29歲胡禮仔就知，錢聚腳，退步中，快被豪門趕走。
"捧黑池不黑"
上周大堆頭博冷貼士表現一般，三冷重心頭關熱刺輸兩粒，嗰龍高美斯真戇居；之後另一「高」，博靴高斯巨冷W先贏後敗只得快感，幸入球「大」得手減損失；好彩，捱到尾關重注撐重點球隊黑池搞掂。主場未贏過票數越夜越冷，一注獨贏頂近3注，但球證上半場執法過嚴趕走西布朗兩件，結果我捱到朝早6點幫黑池頂住贏2:1。連輸兩日好沮喪？連人氣王美國總統奧巴馬，在民主黨中期選舉慘敗，只在記者會聳聳肩講「frustrated」（沮喪）；所以做人貼波，一時挫折也應樂觀冷靜面對，遙遙長路，自信者會信有光明之日。捧黑池，今次真的不黑！
"鯨魚金光閃閃同鹿角鬥攻"
量化寬鬆令股市現狂潮，錢唔值錢，反而資源、磚頭同最夠份量嘅黃金就最醒神；尤其係愛黃金一族，越揸越覺較安心；喺日聯，鯨魚今屆金光閃閃，都係因為一早肯使錢買到好球員，最正當然係鬥莉王肯加盟。
今日佢老哥繼續養傷，球隊作客到今屆勢衞冕失敗嘅鹿角。講開鹿角，佢哋同川崎前鋒一樣，今屆跌watt主因財力同吸引力唔夠，主力季初走投，非戰之罪。今場莊家㩒低鹿角主W，似乎要波友知道鯨魚難再越升越有。但跟紅頂白，唔應該信鯨魚輸波會令餘下日聯秩序好睇啲嘅陰謀論。當旺隊有賠率點都要跟，不過喺度我重點推介入球「大」，呢場騷周日下午必睇。
"利記夠旺唔怕車"
周日好戲碼其實不停，戰友仙道彬兄早上小登科自要到場賀一賀，跟住啲波好戲連場，其中彬兄至愛足球隊嘅利記喺英超尾場迎戰車仔，點都要撐佢。
擁躉旺球隊旺，先請名球探、擅各地發掘新星到英超嘅高莫尼任總監，做好基礎；球隊又漸回正軌，連神奇隊長謝四周中歐霸盃後備入3粒，周日遇「1哥」車仔受讓多，冷門怕乜博！
語錄：心水球隊不會輸一次放棄。周六心水不多，熱刺興奮過後到保頓難踢，下盤穩；周日冷博鯨魚同利記，熱門梗係周中留力嘅阿仙奴大炒紐記。
文：蘋果波神