禮賓府「至慳飯局」仲有啲八卦消息，就係食完飯，煲呔送客，同涂謹申握手講拜拜時，忽然以長毛嗌口號式聲量、毓民掟蕉時嘅氣勢訓示涂謹申：「你好生仔嘞！」由於煲呔講得實在太大聲，因此幾乎全場人都聽到阿涂被特首催生仔，事後阿涂話，「搞到我好鬼尷尬」。
生仔呢回事，唔係話生就生，就算特首下令都無符，難度不比復建居屋、興建置安心低，因此八方希望阿涂都係順其自然啦，千祈唔好太大壓力。
據稱，飯局上煲呔都有叫民建聯李慧琼追多個，因為李慧琼得一粒女，以煲呔認為生三個先夠數嘅標準計，李慧琼要努力追先得，但佢仍然算係新丁，人在江湖，身不由己，議員有冇得放產假先？
不過對部份人嚟講，生仔又未必真係咁難，李家傑一索三男，亦成為噚日飯局話題之一，煲呔對此有甚麼意見呢？有冇恭喜四叔抱孫呢？八方聽聞煲呔冇表態，但身為虔誠教徒嘅佢，就話「呢單嘢神父好嬲」！