哈囉喂正日，準備咗啲朱古力糖，預備邨內小童上門拍門，一人一份。自己唔玩啫，好多細路西化晒，可以玩得好癲，咪來者不拒一味派糖，大家一齊嘻嘻哈哈囉。誰知等咗成晚，無人拍門，自己點會食啲朱古力糖呀，怕糖份高，不利血糖吖嘛，嘥晒。後來與鄰居講起，原來佢話管理處以往接到有住客投訴，話細路白撞拍門，有滋擾性，要求大廈保安看更制止。於是大廈採取新制度，每戶歡迎細路上門者，要預先登記，等看更通知細路，可以上邊個單位，不可以騷擾邊個單位。左丁山點會記住呢啲小節，預先登記吖，於是無人上門。唉吔，一年一度，大家玩吓啫，駛乜咁認真，呢啲事都去投訴，左丁山難以理解，想落亦覺索然無味，明年唔玩咯。其實以往見到上門嘅扮鬼扮馬小孩子，十分天真可愛，怎能拒諸於門外。
又好應景啫，鬼節之後，賜官送我兩部新書，一曰「天賜玄機」，二曰「地獄詞典」。「天賜玄機」專門講鬼，賜官話明：「我不是無神論者，我是無鬼論者」；信冇鬼又講鬼？賜官乃朋友校友之中，通識之王，以往在新亞上學，成日唔上堂，走咗去秘撈，唐牟兩位大師幾乎要通緝佢。點知就因為咁，練就一身小寶神功，兼得天下之秘。（按：兒童不宜，今之學生請勿學習走堂。）此書講天堂與地獄，靈魂鬼魂殭屍鬼與吸血鬼，怪獸幻獸與妖獸，十分過癮，外國人好鍾意吸血鬼，現在HBO播出之劇集「TrueBlood」就係吸血鬼故事，在美國甚受歡迎，左丁山就睇落唔開胃，冇興趣追看。
另一本「地獄詞典」就講靈魂，中西地獄，善神邪魔，黃泉風物，愈睇愈驚，哎吔，早一日收到嘅話，在哈囉喂晚上，無兒童拍門，睇呢本書會十分刺激。賜官曾同老友講及，尖東某大廈有種生基、天圖佈局，甚為陰森，叫我地行埋去就要小心啲，邊間大廈？睇過爭產官司新聞就知道啦，毋須多講。賜官聲言，學習中西文化，由認識他們的陰曹地府開始，於是左丁山在寫字樓一人獨處之時慢慢睇，睇睇吓，點解覺得好凍嘅？背脊浸浸涼，都係咪制，即刻奪門而出。