美國佬狂印美鈔，港紙越來越唔見使，內地同胞帶住一大叠人仔來港消費，狂掃成藥、奶粉、名牌貨，當年（其實都只不過係幾年前）港人北上消費成風，花有限錢就可以做大款，家陣就風水輪流轉，八方同好多打工仔一樣，拎住份糧越嚟越徬徨，原來連特首夫人曾太都有呢種感受，要想辦法慳住荷包。
曾太削餐費節流
噚日煲呔請議員到禮賓府食晏，唔講唔知，在禮賓府公務宴客，人頭計每位預算大約千多元，以一席10人計，即係萬多元一圍，但為咗庫房着想，體恤納稅人，據講曾太近日設法節流，積極慳家，一般公務午宴要食得慳啲，最好食少幾道菜，預算由過萬元減至數千元。
噚日嗰餐飯，係萬豪酒店中菜廳到會，八方收到風要9,000幾元一圍，本來曾太想減幾個餸，不過酒店到會有最低消費，因此呢個已經係最便宜價錢。慳住食有乜餸呢？有份食嘅人形容都係大路菜式，都係嗰三幾味，比較深印象係一道釀蟹蓋，熱辣辣香噴噴好滋味呢。
民建聯係蛇宴專家，黨內對飲食有研究者眾，葉國謙都讚釀蟹蓋好得，八方信佢。佢又話曾太慳家就住嚟食，同立法會比較，其實禮賓府請客已經算係十分豪，事關立法會平日請客，搵鴻星到會大約4,000幾元一圍啫，兩者相差一倍，立法會相形見絀，至於味道方面，葉國謙話唔方便講，總之一分錢一分貨啦。原來條數差咁遠，咁禮賓府「至慳飯局」應該係豪門宴先真喎！
席間禁提敏感詞
食飯風花雪月，煲呔開飯前先旨聲明，席間唔好提及關愛、安心、標準、工資、工時呢啲敏感詞語，大家客隨主便亦好識做，飯桌上唔好辯論。事實上同枱食飯，人人同聲同氣，煲呔圍主家席有張文光、涂謹申同鄭家富三人，據稱煲呔話除咗阿富，同枱都係「建制派朋友」，即係自己人啦，熟不拘禮自便咁話。
根據現場目擊人士爆料，張文光同涂謹申聽到煲呔咁講都冇乜反應，似乎受晒；至於阿富亦都冇意見，反而保皇黨卻表現冇癮。食政治飯啃骨都要若無其事，唔係人人得o架。
mailto:[email protected]