張栢芝復出影壇拍戲，點知惹嚟是非多多，接唔到爾冬陞嘅新戲又俾人話反骨，家拍黃百鳴套賀歲片《最強囍事》，又傳佢片酬千萬高過同戲嘅劉嘉玲，搞到對方唔開心。雖然新聞多多，不過似乎未有影響栢芝開工嘅心情，呢幾日栢芝已經開緊工拍《最》片，其中以栢芝同古天樂嘅對手戲為主。噚日黃百鳴將部份拍攝花絮相貼上微博，相中見栢芝同古仔兩個肩並肩坐喺辦公枱前，栢芝嘅狀態唔錯，仲已經收晒身，單睇外表，點都估唔到佢已經係兩子之母。
Lucas搶媽咪鏡
雖然栢芝忙於拍攝，但一向錫仔錫到燶嘅佢，真係見少兩個乖仔一面都唔得，因為咁栢芝仲叫埋菲傭帶咗大仔Lucas到現場探班；一向動作表情多多嘅Lucas一出現即大受歡迎，工作人員都爭住要同大少爺合照，Lucas話咁易就搶咗媽咪唔少風頭，乖仔咁快出入片場，第日大個如果真係拍戲相信都好易適應。除咗栢芝同古仔外，其他演員仲有熊黛林、曾華倩同賈曉晨，好少拍電影嘅曾華倩仲趁機四處影相留念，佢更鬼馬咁影咗古仔嘅背脊相叫大家估吓係邊個喎！
