浸大噚日請嚟六位普立茲新聞獎得主為學生主持工作坊，美國駐港總領事楊甦棣都有畀面出席，席間話呢個工作坊好啱喺香港搞，因為香港社會討論乜都得，言論自由，例如報道劉曉波獲得諾貝爾獎，「係新聞自由的證明，不是所有地方都可以發生」。
陳新滋聲稱唔了解
言猶在耳，同場另一嘉賓政務司司長唐英年，被問到前日點解唔派官員回應立法會嘅釋放劉曉波辯論時，就即時快閃，「我唔想做訪問住」，隨即擰轉身同其他人吹水，全程不回應記者問題。為工作坊主禮嘅浸大新校長陳新滋仲犀利，被問到點解冇參加校內師生要求中共釋放劉曉波嘅聯署信時，陳校長話「我冇收到（封信）」，跟住又話即使收到，亦好難講會唔會聯署，「因為我對呢樣嘢（劉曉波事件）真係唔係咁了解」。楊甦棣聽到上述兩位仁兄咁樣迴避劉曉波事件，可能會收番覺得工作坊適合在香港搞嘅說話。