今年唔係選舉年，但上個禮拜已經有批最新選舉街板喺中西區曝光，候選人仲係環境局局長邱騰華。八方第一眼見到都嚇一跳，以為邱局長擴建堆填區失敗意興闌珊，卸下官職轉戰區議會服務市民。點知睇真啲局長嘅政績，竟然係標榜容許歐盟二期巴士放毒氣，叫人投票畀邱局長做「殺人空氣禍首」。
其實呢17塊擺喺中西區嘅街板，係環保組織地球之友嘅最新搞作，表達對邱局長拖延公佈空氣質素檢討結果，喺巴士試驗催化器又冇換車長遠計劃配合，總之樣樣得個講字。環保組織激氣，立法會議員都睇唔過眼，由陳淑莊同甘乃威借出街板位置，先成功幫邱局長造到勢！