馬交最佳　橫巷煲仔飯

估唔到，一條鮎魚擦邊游過，11月頭未曾入秋經已一雨成冬。還未及掏出櫳底棉被溫暖溫暖，馬上想到一個個瓦煲熱辣辣，揭開蓋蒸氣騰騰，散發油香飯香與絲絲焦香。事不宜遲，立即動身過大海，即日掃食澳門三大人氣煲仔飯！

記者、攝影：曾冠輝
模特兒：ChristyLee@AModelAgency

南記　雙爐脆香飯焦

即使是鄰市，要即日來回抑或短遊兩天，出發前還是要做一番資料搜集。在一個地道澳門人的留言板中，找到南記，人人異口同聲捧之為馬交最佳煲仔飯，上岸後第一站當然是它。不過，單靠手上地址：草堆街草堆橫巷……」即使路在口邊，還是兜了很大一個圈才找到，南記就是這種躲在橫街橫巷裏的一個小檔。「咦？乜你哋咁早嚟，南記6點先開喎！」好不容易找到卻又摸門釘……
終於天黑，再回到草堆橫巷，巷子變得異常幽暗。巷邊一個如車仔檔的檔口正燒得㷫烚烚，老闆一人獨對8個爐，一邊撥扇吹炭爐，一邊將瓦煲在石油氣爐上翻兩翻，飯熟加蓋焗一焗，埋尾轉到炭爐上慢煮。點解咁做：「用石油氣先煮熟飯後再用炭爐烤一烤，咁樣啲飯會香脆而又唔硬，仲唔使等好耐就有得食，一舉兩得。」要即叫即做，又要快上枱，仲要好食，全部做到真係missionimpossible。要了滑雞與排骨兩煲，分別都是最多人食的台柱款式，20分鐘熱辣辣上枱。一開蓋飯香四溢，加點豉油，若嗜豬油就記得開聲問老闆，再加蓋焗多焗立即將味道提升。飯粒煮得粒粒爆開唔黏身，而且滲透了飯焦香，齋白飯都可吞下整煲。坦白說，從前我是怕吃飯焦的，因大多是硬身唔脆又黏牙的貨色，南記的真如老闆所說：「香脆而又唔硬。」結果通通被我幹掉。

■滑雞和排骨是南記兩大台柱，飯餸雙絕。$26/煲

■爐分兩排：一個煲仔先用石油氣煮熟飯，再轉用炭爐烤。

■揭開蓋離遠都嗅到飯香。

南記：草堆街草堆橫巷6號地下
營業時間：6pm-12mn

補之林　富貴海味煲

話說回頭，一心諗住上岸直奔南記午飯，誰知摸門釘，轉頭立即到另一家同樣在網上起朵的補之林煲仔飯，幸好有做午市。補之林在澳門可謂煲仔飯老店，開業已二十幾年，仲開有兩家分店，連郵政局都選之為代表澳門的地道美食，以之為主題發行郵票，威水！這裏煲仔飯款式相當多，除一般排骨滑雞臘味窩蛋牛，連冬季限定的羊肉、兔肉都有。不過論最有代表性一定是海味招牌飯，單睇排場已夠吸引，餸菜有魚肚、鮑片、瑤柱、滑雞、冬菇等等八九種，相當富貴，一開蓋多到滿瀉，真正餸多過飯。飯身同樣焦香，加上海味鮮味滲入飯中，是少見帶鮮的煲仔飯。網上是有留言投訴指等得太耐，要成30分鐘先有得食，這我倒是早已預料，即製嘛！不過倒沒想過煲仔飯都可以連缽仔加外賣紙盒拎走，打個電話預先柯打再拎返酒店消夜都認真唔錯！

■海味招牌煲$45

■風鱔飯又是另一必試，鱔肉鮮甜肥美。$35

補之林：雅廉訪大馬路41號　
營業時間：12nn-3pm、6pm-12mn

順記　唔等得咪食煲仔

「煲仔要等35分鐘o架吓，等唔等得先！」在福隆新街的順記或許你在買手信時早曾路過，我也一樣，早已領教過店東婆婆的「惡」言相向，其實沒甚麼的，直率一點而已。不計服務，單憑煲仔味道足以令我回頭。不過再大的飯桶，半天幹了兩煲還是會飽飽滯滯，還好順記有各種無飯的煲。啫啫雞煲是馳名的，雞肉滑且入味，以煲仔煮法更是惹味，配飯一流（可惜實在吃不下）。論個人至愛其實是薑葱豬膶煲，豬膶沒有因過熟而變得硬而嚡口，內裏軟腍仍能保持點點juicy，加上薑葱焗極之惹味。Model不好此味，我乾脆一人整煲清掉！