花旗聯儲局公佈QE2嘅規模，係6000億美元，同市場預期嘅差唔多，雖然呢個消息已經炒咗一段時間，但係早幾日市場曾經借QE2規模可能縮水嘅憂慮而調整，所以聯儲局公佈咗細節之後，資金仍然湧入股市，港股上升390點，報收24535，升破24300阻力並且靠近高位收市，成交1201億，下個目標係25000關。
內銀股繼續造好，接力領軍嘅係大落後嘅滙控（005），睇成交同走勢，應該會上試94至96元。
滙控C輪24935：滙控報收85.50元，升3.6%。股價橫行咗接近2個月，家炒上好明顯係好友大戶推高恒指嘅工具，短線向上嘅動力會好強，可以諗吓隻C輪24935。
隻輪現價45.5仙，2011年1月31日到期，行使價84.888元，溢價4.6%，引伸波幅27%，槓桿率18.8倍（有效9.9倍），正股升上96元，24935睇1.20元，升幅逾1倍半，就算正股上到94元止步，升幅都有1.2倍，正股跌穿83元就沽咗隻輪。
俊樺