周嘉玲上月在中環開設首間一站式童裝概念店mamakid，她視為第二個baby，首次創業的她，對前景信心十足，新店裝修由丈夫包辦，由籌備至正式開張面對不小壓力，幸得丈夫精神上支持，開業一個月生意額已相當不錯，她已計劃開分店。
甫走進mamakid第一感覺，是與一般的童裝店有很大分別，室內設計由周嘉玲的丈夫DarrylWilliamGovea一手打造，既時尚又modern，周嘉玲說：「間舖係大人嘅世界，主要係想吸引父母買童裝畀子女，所以環境要吸引到大人，想有新鮮感，裝修比較modern，除咗引入歐、美、日30多個品牌嘅童裝之外，店內還有一個迷你圖書閣，主要賣兒童圖書同日本木製玩具。」
計劃開分店
由打工榮升老闆的周嘉玲，樣樣事情親力親為，視新店為自己第二個baby的她說：「開店嗰日都好感動，就好似自己個BB出世，亦係人生一個重大嘅改變，裝修比想像中更靚，真係好多謝老公同佢嘅設計團隊，準備咗一年嘅心血並冇白費，睇見客人嘅feedback都好開心。
「頭一個月遇到最大難題係貨品物流，家都係學習中，不過比打工自由得多，因為一切歸於自己。」周嘉玲請了兩名員工幫手，她每天也會落舖巡視業務。
雖然開店僅一個月，但周嘉玲已經想開分店，她說：「我已經諗緊開分店，仲想引入更多牌子，雖然辛苦，我做嘅係小生意，唔同大百貨公司有好多人幫手，樣樣落手落腳，但好好玩，而且好有成功感。」
圖書多人買
拍攝當日周嘉玲更充當模特兒與小model一起示範親子裝，她說：「呢個係英國牌子DandyStar，有唔同嘅tee，有大人有細路，又有日本潮牌Undercover。圖書嘅需求都好大，受歡迎嘅已經要再入貨，木製玩具MemoryMatch係幫助小朋友發展記憶力，都好好賣。」
採訪：顏英儀
攝影：陳志嵐
示範：EsmeV.ofStarzPeople
場地：mamakid（中環萬宜大廈）
