花旗佬嘅QE2帶挈新興市場股樓齊升，無厘頭仲帶挈埋華華晨咁早開工！件事係咁嘅，以往但凡地球上有任何金融動盪風吹草動，「金融沙皇」任志剛就會晨早7點幾開工之前，響金管局樓下（國金中心大堂）set晒咪stand同大家講話，分析吓最新外圍形勢，呢個情景大家一定唔會陌生，而響傳媒軼史上，大家稱之為「志剛廣場升旗禮」！
雷曼爆煲 任總朝朝解畫
咁新人事新作風，「攞命陳」陳德霖舊年10月上馬後，唔知係咪冇乜嘢同大家分享，所以，大家已經好耐唔睇升旗！家陣佢可能覺悟到地球立立亂，係時候出嚟畀世人一啲指引，所以，前晚深夜睇完QE2出台，噚日晨咁早都要見見大家，唔計第一日返工同大家講早晨，呢鋪應該係佢「處女升旗」！
尤記得當年雷曼爆煲，任總差唔多朝朝升旗穩定人心，咁都唔止，05年「7.21」人民幣一次過升值兩個巴仙，當時市場消息禾雀亂飛，佢啱啱喺北海道夜機返到香港，都二話不說晚頭9點幾升旗，為眾生解開謎團……陳總，經噚日一役，「志剛廣場」將易名為「德霖小館」，記得勤啲開鑊呀!
李華華