如果音樂係世界語言，炒股在香港都算係唔少人嘅共同語言。敏妮前排因腳傷入院，出院後仍要做物理治療。起初位物理治療師相當cool，尤其每次捽傷患搞到敏妮痛到大喊時，佢就會勁cool咁話：「得，知你痛，唔使叫！」不過，自從某次提到股票投資，佢突然變得親切健談。
物理治療師話自己工作繁忙兼唔識炒股，所以將個人投資嘅責任假手於人，走去買基金。睇開呢個欄嘅朋友都知，敏妮一向唔鼓勵人去買基金，敏妮問：「咁回報好唔好？」點知佢話：「買咩都冇睇，我長線投資嘛！不過我都唔抱厚望，總知唔使蝕本就得。」吓！如果只係但求唔蝕本，去銀行做定存咪得囉，搞咁多嘢做乜？
見敏妮咁講，治療師即刻話：「我都有買股票，好似A50（2823），我每個月都有買嚟儲，家陣好唔好沽咗佢呢？」由於敏妮唔想做緊治療時，幫佢「開壇」分析portfolio，所以冇問佢何時買、持股量同有乜投資目標等，只係同佢講：「A50唔使咁早沽住，可以揸長啲時間。」敏妮仲引用名家魏力對A50嘅分析話：「家陣A股都係3000點左右，歷史高位係6000點。大陸經濟好到要加息，股市點會唔創新高，A50梗係長揸啦。」
散戶投資應先學習
以為治療師會好滿意呢個答案，點知佢話，「即係唔沽得，放響度會好悶喎。」原來佢並唔係真正嘅長線投資者，反而係鍾意偶然落場炒吓，做跟風散戶。話晒佢醫緊敏妮，所以敏妮就建議佢既然有貨響手，不如做期權coveredcall。不過，佢聽完敏妮講解coveredcall嘅原理同操作，就覺得係好高深嘅投資伎倆，似乎興趣不大。
敏妮覺得，響「投資」領域上面，好大程度大家都係同一起步點，即使你係專業人士，如果拒絕學習，一樣唔識投資。
溫敏妮
http://wanmanli.com/blogs/