大家樂待薄員工，局長話扣飯鐘冇犯法，香港確係一個營商好地方，不過行會召集人梁振英唔係咁睇，繼早前好言相勸大家樂後，噚日再出手，指守法只係做生意最低要求，做人、做事，仲要合情、合理同公義，否則即使守法，仍然唔會獲社會接受。
梁召集人曉以大義，指現代社會嘅標準，要求僱主履行企業社會責任，善待員工，如果僱傭關係中只有法律，而冇情理規範，呢種勞資關係一定不和諧，佢又話最低工資水平就快出台，「深切」希望僱主唔好以「合法」為唯一標準，因為不合情理嘅僱主，最終要承受巨大商譽損失。和諧乃係阿爺執政最高目標，梁召集人擺出呢兩個字，大家樂陳老闆仲唔識做？