老董在位時有個暱稱「7-11」，唔係話佢無處不在總有一間喺左近，而係形容佢工作時間超長，日日做足16個鐘頭，煲呔唔知係咪以前老闆為榜樣，噚日自爆日日「6-12」，工時比老董仲多兩小時。
堅持拆政府總部西座
煲呔噚日出席商會午餐會演講，話平日有時清晨4點就起身，要即刻睇文件，凌晨5點左右開始做一小時運動，朝早6點正式開工，之後就全日不停工作，直到深宵先收工，有時好彩仲有精神，瞓覺前會讀《聖經》。
日日做足18小時，難怪煲呔力促研究就標準工時立法，不過佢話幫唔到佢，事關佢餘下任期不足兩年，標準工時唔可能在佢任內立法。添馬艦新政府總部工程趕工，相信煲呔落任前落成，現時政府總部會保留東翼同中座，西座就拆卸做商廈，公民黨要求整個政府山保留，煲呔噚日不點名批評有政客要將政府山做草皮放牛，呼籲商界發聲，爭取建商廈增加商廈樓面供應。公民黨批評煲呔抹黑，因為佢哋冇話過要在中環養牛，而係還政府山於民，煲呔咁講即係詆毀市民係畜牲，要求佢道歉。