世界艱難，搵奶粉錢難，大陸奶粉想搵散戶錢更難。內地乳業近年不時發生再現三聚氰胺奶粉惹來食品安全恐慌，咁乳業股嘅前途就真係好令人好令人擔心。
大家不妨諗吓點解一罐全港最貴美贊臣安嬰兒A+1號奶粉零售價270蚊，內地零售價卻是要賣370蚊，因為內地人有能力都唔想食番國產奶粉。
呢期在本港上市嘅乳業股隻隻都跌，上咗好耐甚至變身兼蝕到喊嗰件都跌。然則，點解隻現代牧業可以用2011及2012年60倍及29.5倍PE招股嘅呢？
呢期招股嘅股份好似四環醫藥（460）已經唔係用緊招股書今年嘅30倍PE而係用2011年嘅26.7倍PE做賣點。而去年全球銷售額28.3億美元嘅美贊臣（MJN），2/3銷售收入更係來自美國以外地區，過去一個季度銷售收入增長16%，當中12%來自銷量上升、3%來自提價、1%來自滙兌收益；來自亞洲及拉丁美洲收入增長18%，佔整體銷售比重60.4%，佢哋仲會拓展埋印度市場。
美贊臣跑贏指數
美贊臣堪稱全港最貴奶粉，由Bristol-MyersSquibb（BMY）於舊年2月金融海嘯最慘烈期間以每股24美元分拆3千萬股上市嘅美贊臣，股價過去一年升幅達40.7%、年初至今亦升35.4%，早已跑贏指數；母公司BMY仍揸住83%股權唔放，點解仲揸得咁重？好嘢點會想賣出嚟跟外人分身家，唔好忘記舊年第一季個市咁慘，MJN係舊年全年成功上市嘅少數企業之一，家做緊30倍PE，仲要係2009年往績PE，按過去3季度業績推算，現價處於今年25倍PE水平，百年老店加響噹噹品牌，加上提價能力，諗諗吓，都應該去大銀行開番個近期佢哋宣傳緊可以一個戶口炒埋港股美股嘅戶口，尋寶嘅時候都唔使咁局限。
胡孟青
作者為獨立股評人