單人匹馬行走江湖多年嘅卿姐，加入民主黨後瞬即進入角色，當上副主席，仲積極培養接班人，成立「婦女黨團」，今個月20號舉行首屆婦女黨員大會，為女性議員同社區主任提供平台交流地區工作同議會經驗，卿姐講到明，希望推動婦女參政，培訓新人。
疑爭取女性選民支持
婦女黨團召集人係學者黃碧雲，黨內所有女議員、女社區主任都要參加，其他女黨員亦無任歡迎，首次舉行嘅婦女黨員大會有個特別嘉賓，係著名導演許鞍華。據講今次係卿姐提出請許鞍華到場，因為佢早前睇完《得閒炒飯》，覺得套戲好好睇，尤其係探討現代女性自主方面十分有啟發性，於是接觸許鞍華請佢做演講嘉賓。
許鞍華平日罕有談政治，對於卿姐邀請，據聞十分有興趣，仲要求民主黨提供資料畀佢做定功課，八方唔知許鞍華對民主黨支持政改有甚麼意見，會唔會問卿姐嘅心路歷程呢？卿姐好投入黨務，年底民主黨領導層改選，好大機會增加多一個副主席，卿姐噚日表明會推薦資深區議員陳樹英（即係李永達太太）做副主席，仲大讚陳樹英對黨「好大貢獻」，指佢唔係一棵樹，係「一碌杉」撐住民主黨。
卿姐話陳樹英已接受提名，張文光亦表態支持陳樹英上位，而未來一年，民主黨立法會議員要每人提出一項有關女性平權嘅動議辯論或質詢，以示重視女性權益。如此重視女性，八方思疑同想爭取女性選票，補充流失嘅80後選民有關，至於會唔會顧此失彼，令民主黨立場更加保守，值得觀察。
民主黨被攻擊感憤怒
解決支持者流失問題刻不容緩，事關要求民主黨「票債票還」嘅「選民力量」，近日不斷翻民主黨舊賬，指卿姐曾揚言若「超級區議員」提名門檻過高，封殺小黨、獨立人士參選機會，卿姐講過會辭職。面對挑戰，卿姐噚日在facebook回應，澄清民主黨一直要求提名人數10至20人，現時15個提名人建議符合要求，對於有人未了解民主黨建議就作出「攻擊」，卿姐「感到憤怒」，要求佢引咎辭職唔合理囉。
mailto:[email protected]