醫管局新行政總裁人選噚日終於正式拍板，冇驚喜，由人稱PY嘅質素及安全總監梁栢賢出任，最快今日會正式公佈。PY任期3年，下周一履新。PY升職同時勁加薪六成，做總監年薪約300萬元，行政總裁年薪達480萬元，呢個數包括15%大約60幾萬元約滿酬金、公積金同保險等福利。
為免被指肥上瘦下，八方聽聞醫管局公佈新任命時，會解釋人工計算方法。至於PY現時負責嘅醫療事故同醫院質素總監一職，可能會內部招聘。其實行政總裁遴選委員會早就屬意由PY接任，所以噚日開會好快就扑槌決定。本身係公務員嘅PY，已經向公務員事務局辭職，獲相關委員豁免唔需要佢過冷河就可以即刻返新工。