最近煲呔要四圍撲為佢嗰份施政報告做路演，推銷百億關愛基金，同班大孖沙講點樣關愛社會、重新做人，而佢個好兄弟財爺鬍鬚曾，雖然施政報告唔關佢事，又未有耐要為下年份預算案做諮詢，但係佢早排都要四圍飛，去外國推銷香港。噚晚有人報料畀八方，話見到鬍鬚曾孖住電盈主席李澤楷，同埋一班商界中人，陪住一班老外去鯉魚門「政界飯堂」海皇園林海鮮酒家食飯。
據聞噚晚筵開四席，一於炒蝦拆蟹，成班人食到成10點先走，有份食嘅財政司司長辦公室政務主任鄭青文同八方講，今次係鬍鬚曾外國朋友嚟香港，於是財爺帶佢哋食吓香港地道海鮮，佢又透露呢班老外朋友來自俄羅斯。
大家都知煲呔、鬍鬚曾十分落力吸引俄羅斯富豪嚟香港投資，莫非呢班「外國朋友」今次係嚟香港視察環境，所以先要鬍鬚曾親自接待？