被質疑無捍衞港台編輯自主嘅黃華麒，近日終於反擊，話說記協刊物《記者之聲》刊登一篇署名「香港電台一員工」嘅文章，由《頭條新聞》兩個主持人森叔、小豪子續約問題講起，話港台員工對麒叔信任有問號，有報章星期二轉載呢篇文，一而再，再而三被人批評，麒叔終於出手。
據講麒叔前日向全台員工發出公開信，花咗唔少筆墨說明自己做嘅事，都係為咗港台好，希望提高節目質素。不過，去到最後一段先係戲肉，麒叔表示對於有人「大做文章」，「無限上綱上線」，質疑佢處事嘅出發點「表示遺憾」。
有港台中人同八方講，記憶中歷任台長罕有向全體員工發出類似信件，麒叔今次豁出去，唔知仲有冇下文？港台發言人稱台長出信，只係同員工正常溝通方式之一。